Byggðaráð Múlaþings

Fjármálastjóri og sveitarstjóri fóru yfir og kynntu mál er varða fjármál og rekstur sveitarfélagsins.

Fjármálastjóri og sveitarstjóri fóru yfir stöðu vinnu fjárhagsáætlunar Múlaþings 2025 og þriggja ára áætlunar 2026 til 2028 á grundvelli rammaáætlunar sem samþykkt var af sveitarstjórn 12. júní 2024.

Í vinnslu.

Fyrir liggur minnisblað með þeim málum / þjónustuþáttum sem tilheyra byggðaráði og stjórnsýslu- og fjármálasviði í drögum að stefnu um þjónustustig í byggðum Múlaþings, á Borgarfirði eystra, Djúpavogi og Seyðisfirði. Á fundinn undir þessum lið mætti Óðinn Gunnar Óðinsson skrifstofustjóri.

Í vinnslu.

Fyrir liggur fundargerð matsnefndar, dags. 28.10.2024, varðandi umsókn Múlaþings um stofnframlag vegna Bláargerðis 4 á Egilsstöðum.

Eftirfarandi tillaga lögð fram:
Byggðaráð Múlaþings samþykkir tillögu matsnefndar um að sótt verði um stofnframlag vegna fyrirhugaðrar uppbyggingar í Bláargerði 4 á Egilsstöðum í samræmi við fyrirliggjandi drög að umsókn.

Samþykkt samhljóða án atkvæðagreiðslu.

Fyrir liggur erindi frá Framkvæmdasýslu - Ríkiseignum þar sem óskað er eftir samþykki sveitarfélagsins Múlaþings um að brunabótum verði ráðstafað í hreinsun brunarústa, endurbætur og lagfæringar á íbúðarhúsinu auk þess að möguleg verði endurbygging útihúsa síðar. Inn á fundinn undir þessum lið tengdust Erlendur Ágúst Einarsson og Bylgja Rún Ólafsdóttir og fóru yfir viðhorf ábúenda til málsins.

Eftirfarandi tillaga lögð fram:
Byggðaráð Múlaþings samþykkir að verða við ósk landeiganda og ábúenda um heimild til hreinsunar brunarústa, endurbóta og lagfæringu á íbúðarhúsinu á jörðinni Unaósi en að útveggir útihúsa fái að standa áfram þó þau verði ekki endurbyggð strax. Byggðaráð beinir því til stjórnvalda að áherslur varðandi útleigu ríkisjarða verði teknar til gagngerrar endurskoðunar með það að markmiði að tryggja réttindi ábúenda, viðhalda verðmæti ríkisjarða og tryggja búsetu á þeim til framtíðar. Byggðaráð leggur jafnframt áherslu á að úthús við Unaós verði endurbyggð þó síðar verði.

Samþykkt samhljóða án atkvæðagreiðslu.

Til umfjöllunar var hugmynd að leikskólabyggingu á suðursvæði á Egilsstöðum. Inn á fundinn undir þessum lið tengdist Róbert Óskar Sigurvaldason og fór yfir hugmyndir varðandi uppbyggingu íbúða og leikskóla á suðursvæði á Egilsstöðum.

Lagt fram til kynningar.

Fyrir liggur fundargerð svæðisráðs um strandsvæðisskipulag á Austfjörðum, dags. 01.10.2024, auk svara Skipulagsstofnunar við erindi samtakanna VÁ vegna Seyðisfjarðar.

Lagt fram til kynningar.

Fyrir liggur erindi frá Tækniminjasafni Austurlands varðandi hækkun á rekstrarstyrk fyrir árið 2025. Einnig liggur fyrir greining sveitarstjóra, fjármálastjóra og atvinnu- og menningarmálastjóra á því hvernig megi bregðast við erindinu miðað við að það rúmist innan samþykktrar rammaáætlunar sveitarfélagsins.

Í vinnslu.

Fyrir liggur erindi frá Sögufélagi Seyðisfjarðar þar sem óskað er eftir samtali með byggðaráði varðandi mögulega aðkomu sveitarfélagsins að ritun sögu Seyðisfjarðar.

Eftirfarandi tillaga lögð fram:
Byggðaráð Múlaþings samþykkir að bjóða fulltrúum í stjórn Sögufélags Seyðisfjarðar að tengjast inn á fund byggðaráðs þar sem umfjöllunarefnið verði möguleg aðkoma sveitarfélagsins að verkefninu.

Samþykkt samhljóða án atkvæðagreiðslu.

Fyrir liggur fundargerð stjórnar Minjasafns Austurlands, dags. 21.10.2024, auk fjárhagsáætlunar fyrir árið 2025.

Lagt framt til kynningar.

Fyrir liggur erindi frá formanni stjórnar LungA varðandi mögulega framlengingu á framlagi sveitarfélagsins til hátíðarinnar um tvö ár. Fjármunum verði m.a. varið til að draga saman sögu hátíðarinnar.

Eftirfarandi tillaga lögð fram:
Byggðaráð Múlaþings sér sér ekki fært að verða við erindinu, en bendir á að hægt er að sækja um styrk við úthlutun menningarstyrkja Múlaþings.

Samþykkt samhljóða án atkvæðagreiðslu.

Fyrir liggur erindi frá Kjartani Þór Ragnarssyni, f.h. samráðshóps um skeldýrarækt, þar sem sveitarfélaginu Múlaþingi er boðið að eiga aðild að minnisblaði sem til stendur að leggja fyrir fjárlaganefnd Alþingis varðandi möguleg fjárframlög úr ríkissjóði til að byggja upp kræklingarækt á Íslandi.

Eftirfarandi tillaga lögð fram:
Byggðaráð Múlaþings samþykkir að sveitarfélagið verði aðili að minnisblaði sem til stendur að leggja fyrir fjárlaganefnd Alþingis varðandi möguleg fjárframlög úr ríkissjóði til að byggja upp kræklingarækt á Íslandi. Starfsmanni falið að koma því á framfæri.

Samþykkt samhljóða án atkvæðagreiðslu.

Fyrir liggur að staðfesta þarf kjörstaði í Múlaþingi vegna Alþingiskosninga 30. nóvember 2024 auk aðstöðu fyrir kosningar utan kjörfundar.

Eftirfarandi tillaga lögð fram:
Sveitarstjórn Múlaþings staðfestir að kjörstaðir í Múlaþingi verði á eftirfarandi stöðum: Í Hreppsstofu á Borgarfirði eystra, í Tryggvabúð á Djúpavogi, í Menntaskólanum á Egilsstöðum og í Íþróttahúsinu á Seyðisfirði. Hægt verður að kjósa utan kjörfundar á skrifstofum sveitarfélagsins á Borgarfirði og á Djúpavogi, á opnunartímum skrifstofanna frá og með 18. nóvember til og með 29. nóvember.

Samþykkt samhljóða án atkvæðagreiðslu.