Flýtileiðir á verkefnavefi/kortasjár
Aðalskipulag Múlaþings
Flokkun landbúnaðarlands
Skráning vega í náttúru Íslands
Staða verkefnis
Sveitarstjórn Múlaþings samþykkti 12. mars 2025 að kynna vinnslutillögu vegna nýs Aðalskipulags Múlaþings 2025-2045 í samræmi við 2. mgr. 30. gr. skipulagslaga nr. 123/2010. Óskað er eftir að umsagnir og ábendingar berist fyrir 5. maí 2025 á rafrænan hátt í gegnum Skipulagsgátt en þar er jafnframt hægt að fylgjast með opinberum ferli málsins og nálgast öll gögn. Fyrirspurnum skal beina á netfangið skipulagsfulltrui@mulathing.is
Umhverfis- og framkvæmdaráð Múlaþings fer með leiðandi hlutverk í gerð nýs aðalskipulags. Skipulagsráðgjafi við vinnuna er EFLA verkfræðistofa og myndar, ásamt starfsfólki umhverfs- og framkvæmdasviðs, stýrihóp um verkefnið. Í hópnum sitja eftirfarandi starfsmenn sveitarfélagsins:
- Hugrún Hjálmarsdóttir, framkvæmda- og umhverfismálastjóri
- Sigríður Kristjánsdóttir, skipulagsfulltrúi
- Sóley Valdimarsdóttir, verkefnastjóri skipulagsmála
Hægt að fylgjast með fundarbókunum hjá nefndum og ráðum sveitarfélagsins hér - 202208083 - Aðalskipulag Múlaþings
Verkefnavefur
Settur hefur verið upp verkefnavefur sem ætlað er að halda utan um og kynna skipulagsvinnuna á verktíma. Hér fyrir neðan er stutt kynningarmyndband um vefinn.
Skipulags- og matslýsing
Skipulags- og matslýsing var kynnt í janúar 2024 og haldinn var rafrænn kynningarfundur 18.janúar sem streymt avr á miðlum Múlaþings.
Ákveðið var að hafa fundinn eingöngu í streymi, ekki síst vegna árstímans (óútreiknanlegt veður með tilheyrandi samgönguröskunum) en einnig á þeirri forsendu að á þessum tímapunkti var áherslan á að kynna það sem framundan er, skipulagsferlið og hvernig þátttöku íbúa yrði háttað. Stefnt var að íbúafundum í hverjum kjarna þegar líður á skipulagsvinnuna þar sem vonast er eftir líflegum umræðum og þátttöku íbúa.
Upptaka af kynningafundi.
Verkefni samhliða gerð nýs aðalskipulags
Samhliða gerð nýs aðalskipulags liggur fyrir sveitarfélaginu að vinna að flokkun landbúnaðarlands, með tilliti til hversu vel landið er fallið til akuryrkju, og skrá vegi í náttúru Íslands. Unnið verður að skráningu þessara verkefna í gegnum verkefnavef aðalskipulagsins þar sem íbúar geta sent inn ábendingar um einstök atriði í gegnum kortasjá.
Skráning vega í náttúru Íslands
Lengi hefur ríkt óvissa um vegakerfi í óbyggðum, þ.e. hvaða leiðir er heimilt að aka, hvar er um að ræða utanvegaakstur og hver tekur ákvarðanir um slíkt vegakerfi. Með náttúruverndarlögum sem tóku gildi árið 2015 og reglugerð sem sett var á grundvelli þeirra árið 2018 hefur verið fest umgjörð um það hvernig standa skal að ákvörðunum um vegakerfi í náttúru Íslands, þ.e. um aðrar ökuleiðir utan byggða en þær sem tilheyra þjóðvegakerfinu. Það er á ábyrgð sveitarstjórna að ákveða slíkar ökuleiðir og taka saman í skrá yfir vegi í náttúru Íslands, aðra en þjóðvegi. Vegaskráin skal unnin samhliða gerð aðalskipulags eða eftir atvikum svæðisskipulags.
Með vegaskránni verður til heildstæð skráning yfir vegi í náttúru Íslands þar sem umferð vélknúinna ökutækja er heimil, með eða án takmarkana.
Leiðbeiningar Skipulagsstofnunar um skráningu vega í náttúru Íslands
Flokkun landbúnaðarlands
Landbúnaðarland sem er vel fallið til ræktunar matvæla og fóðurs er verðmæt auðlind. Sé þörf á að á að viðhalda og efla matvælaframleiðslu eða aðra ræktun er mikilvægt að slíku landi sé ekki ráðstafað til annarra nota, en töluverð samkeppni ríkir um land. Sveitarfélög hafa tækifæri til að vernda gott ræktunarland við aðalskipulagsgerð en til þess að það sé raunhæft þarf að vera búið að flokka land, þannig að ljóst sé hvar gott ræktunarland er að finna.
Atvinnuvega- og nýsköpunarráðuneytið gaf út leiðbeiningar um flokkun landbúnaðarlands en í þeim er horft til stefnu stjórnvalda eins og hún birtist í jarðalögum og gildandi landsskipulagsstefnu. Auk þess í lögum um náttúruvernd, lögum um landgræðslu, lögum um skóga og skógrækt og skipulagsreglugerð.
Áhersla er á að flokka land sem nýtist til ræktunar á matvælum og fóðri í fjóra flokka út frá ræktunarhæfni: mjög gott, gott, sæmilegt og lélegt ræktunarland. Niðurstöðum flokkunarinnar er ætlað að nýtast sem forsenda við stefnumörkun um landbúnaðarand við gerð aðalskipulags.