Heimastjórn Seyðisfjarðar

Eftirfarandi bókun lögð fram:
Heimastjórn Seyðisfjarðar mótmælir harðlega fyrirhugaðri lokun útibús Landsbanka Íslands á Seyðisfirði.
Það er ólíðandi að banki í eigu hins opinbera skuli ekki leita allra leiða til að halda úti þjónustu á landinu öllu.
Fjölmörg störf í bankaþjónustu þurfa ekki að vera bundin við staðsetningu og því er vel hægt að færa verkefni bankans sem vinna má í fjarvinnu, út á land,til að styrkja þau útibú sem eru til staðar og jafnvel fjölga stöðugildum á landsbyggðinni frekar en að fækka þeim.

Fjölmörg íslensk fyrirtæki hafa starfsfólk í vinnu við hin ýmiss verkefni, jafnvel í öðrum löndum í gegnum fjarvinnu og ætti Landsbankinn að horfa til þess að styrkja stoður sínar út um land allt í stað þess að setja alla starfsemi á einn stað á landinu. Heimastjórn vísar málinu til byggaðaráðs til umfjöllunar.

Samþykkt samhljóða með handauppréttingu.

Heimastjórn gerir ekki athugasemdir við niðurstöður umhverfismats en ítrekar mikilvægi þess að lega vegar, er ætlaður er til efnisflutninga yfir Fjarðará, verði unnin í samráði við sveitarfélagið. Vegurinn er tilgreindur í aðalskipulagi sveitarfélagsins og ætlað að vera ný tenging inn á fyrirhugað íbúðarsvæði.

Samþykkt samhljóða með handauppréttingu.

Heimastjórn þakkar Einari Georgssyni fyrir upplýsingarnar, fyrirhugað er að fyrstu íbúar geti flutt inn í byrjun maí. Heimastjórn gleðst yfir því að þetta verkefni sé að raungerast.
Stefnt er að því að hafa opið hús sem yrði þá auglýst á næstum dögum. Heimastjórn hvetur áhugasama að sækja um þrátt fyrir að uppfylla mögulega ekki öll skilyrði.

Eftirfarandi tillaga lögð fram:
Heimastjórn þakkar fyrir þær hugmyndir sem bárust og snéru meðal annars að uppsetningu á klifurvegg, töfrateppi í Stafdal, stækkun og bættu aðgengi að sjóðbaðsstofunni SAMAN, útilíkamsrækt, sólargeisli í Hólmann auk þess sem fjöldi hugmynda barst frá grunnskólanemendum.
Niðurstaða heimastjórnar er að fara að tillögum grunnskólanemenda og setja upp rampa fyrir hjól, hjólabretti og línuskauta. Einnig er von á, í tengslum við frágang á ofanflóðavörnum við Fjarðargarð, að gerð verði hjólabraut þar.
Heimastjórn ætlar einnig að styrkja foreldrafélag leikskóladeildar Seyðisfjarðarskóla í kaupum og uppsetningu á leiktæki fyrir yngstu börnin með aðkomu Seyðisfjarðarskóla.

Samþykkt samhljóða með handauppréttingu

Heimastjórn þakkar Eggerti Má fyrir góðar upplýsingar og yfirferð.

Lagt fram til kynningar.

Íbúafundur - Aðalskipulagið: 9.apríl nk. verður haldinn íbúafundur vegna kynningar á vinnslutillögu nýs aðalskipulags Múlaþings 2025-2045. Fundurinn fer fram í Herðubreið kl.17:00 - 19:00. Fundarstjóri verður Sigríður Kristjánsdóttir skipulagsfulltrúi Múlaþings.

Stefnt er að íbúafundi heimastjórnar í byrjun júní.

Hafnarmál: Ýmislegt hefur verið að gerast hjá þeim á höfninni. Má þar helst nefna, að búið er að brytja niður bátinn Ramónu sem legið hefur innan við smábátahöfnina og einnig búið að rífa niður bryggjuna við Flísahúsið á Strandarvegi. Upplýsingaskilti verður sett fljótlega upp við ferjuhúsið og verið er að klára skilti fyrir umferðarstýringu á Bjólfsgötunni sem gildir yfir sumartímann.

Tjaldsvæðið: Framlengdur hefur verið samningur til eins árs við Landamerki ehf. um rekstur tjaldsvæðisins hér á Seyðisfirði. Landamerki hafa séð um reksturinn síðustu fjögur árin með ágætum.

SnoCross: Fyrirhugað er Íslandsmeistaramót í SnoCrossi á Fjarðarheiðinni 11. og 12. apríl nk. Keppt er í barnaflokki, kvennaflokki og svo flokkum fyrir lengra komna. Hvetjum alla áhugasama til að mæta.

Umhverfismatsskýrslan: Haldinn var kynningarfundur um umhverfismat fyrir ofanflóðavarnir undir Botnum í gær. Kynningin fór fram í Herðubreið kl. 20:00 og var mjög góð mæting. Erla Björg Aðalsteinsdóttir frá VSÓ kynnti niðurstöður umhverfismatsins og Kristín Martha Hákonardóttir fór yfir stöðu verkefnisins fyrir hönd Ofanflóðasjóðs. Umsagnir þurfa að berast fyrir 24.apríl inn á skipulagsgatt.is