Heimastjórn Borgarfjarðar

Fyrir liggur bréf frá Bryndísi Snjólfsdóttur og Elísabetu Sveinsdóttur sem barst 10.07.2024 um umgengni og ruslasöfnun íbúa á Borgarfirði og er óskað eftir að farið verði í úrbætur auk þess sem gerðar eru tillögur um staðsetningu gámasvæðis.

Heimastjórn Borgarfjarðar þakkar bréfriturum brýninguna og er sammála þeim um að víða sé hægt að gera betur þegar kemur að umgengi og umhirðu í þorpinu og hvetur íbúa og fyrirtækjaeigendur til að taka til í kringum sig.
Jafnframt óskar heimastjórn eftir því að framkvæmda- og umhverfismálastjóri mæti á næsta fund heimastjórnar þar sem leitað verði lausna um mögulega staðsetningu fyrir gáma og fleira er varðar umgengni.

Samþykkt samhljóða með handauppréttingu.

Til umræðu eru málefni Stakkahlíðar í Loðmundarfirði og fyrirhugaður kynningarfundur um friðlýsingarmál.

Heimastjórn Borgarfjarðar felur starfsmanni að undirbúa íbúa- og kynningarfund um mögulega friðlýsingu í Stakkahlíð sem gert er ráð fyrir að verði haldinn í lok september, í Loðmundafirði ef veður og færð leyfir, að öðrum kosti á Borgarfirði.

Samþykkt samhljóða með handauppréttingu.

Fyrir liggja til kynningar, frá Sambandi íslenskra sveitarfélaga, leiðbeiningar fyrir sveitarfélög um meðferð ágangsfjár.

Lagt fram til kynningar.

Fyrir liggur gangnaseðill fyrir Borgarfjörð til afgreiðslu.

Heimastjórn Borgarfjarðar samþykkir fyrirliggjandi gangnaseðil fyrir Borgarfjörð eystra.

Samþykkt samhljóða með handauppréttingu.

Til umfjöllunar eru málefni Fjarðarborgar.

Heimastjórn Borgarfjarðar leggur áherslu á að hið allra fyrsta verði brugðist við skemmdum í kjallara undir sviði Fjarðarborgar, þar sem vatnslögn sprakk í vor, til að koma í veg fyrir frekara tjón af þess völdum. Að mati heimastjórnar þarf að fjarlægja allt timburverk í kjallara og í bakdyrainngangi (viðbyggingu). Endurnýja þarf dren meðfram kjallara svo koma megi í veg fyrir að leirblandað vatn leki áfram inn í kjallarann og stöðva leka í gegnum þak hússins.
Heimastjórn beinir því til umhverfis- og framkvæmdaráðs að bregðast við þessu ástandi hið fyrsta.

Samþykkt samhljóða með handauppréttingu.

Til umfjöllunar eru málefni Hafnarhólma og gjaldtaka.
Inn á fundinn undir þessum lið mætti Aðalheiður Borgþórsdóttir, atvinnu- og menningarmálastjóri.

Heimastjórn Borgarfjarðar leggur til að hafinn verði undirbúningur gjaldtöku í Hafnarhólma. Starfsmanni falið að vinna að útfærslu gjaldtökunnar sem lögð verði fyrir heimastjórn í haust. Starfsmanni jafnframt falið að huga að viðhaldsþörf fyrir næsta ár og uppbyggingu sýningar á efstu hæð Hafnarhúss.

Samþykkt samhljóða með handauppréttingu.