Fjölskylduráð Múlaþings

Fyrir liggja skóladagatöl Tónlistarskólans á Egilsstöðum og Tónlistarskólans í Fellabæ fyrir skólaárið 2024-2025.

Sóley Þrastardóttir, skólastjóri Tónlistarskólans á Egilsstöðum, kynnti tillögur að skóladagatali tónlistarskólans. Skóladagatalið hefur verið samþykkt hjá starfsfólki.
Sigurbjörg Hvönn Kristjánsdóttir, fræðslustjóri, kynnti tillögur að skóladagatali Tónlistarskólans í Fellabæ. Skóladagatalið hefur verið samþykkt hjá starfsfólki.

Fjölskylduráð samþykkir skóladagatölin samhljóða með handauppréttingu.

Fyrir liggur minnisblað sem tekið var saman eftir íbúafund í Brúarási og að Eiðum 16. og 17. apríl 2024, og vísað er til fjölskylduráðs.

Á íbúafundinum var rætt um aðbúnað í mötuneyti Brúarásskóla, samræming á skólaakstri og íþróttaæfingum Hattar og lenging á opnun leikskólans fram í júní.
Fræðslustjóra er falið að vinna að málum í samræmi við umræður á fundinum.

Samþykkt samhljóða með handauppréttingu.

Málið áfram í vinnslu.

Fyrir liggja skóladagatöl leikskóladeildar Seyðisfjarðarskóla og sameiginlegt skóladagatal leikskólans Glaumbæjar og Grunnskólans á Borgarfirði fyrir skólaárið 2024-2025.

Þórunn Óladóttir, skólastjóri Seyðisfjarðarskóla, kynnti tillögur að skóladagatali leikskólans.

Fjölskylduráð samþykkir skóladagatölin með þeim fyrirvara að dagatölin hafi verið samþykkt af starfsfólki skólanna.

Samhljóða með handauppréttingu.

Fyrir liggur ályktun frá foreldraráði Hádegishöfða, dagsett 29. apríl 2024, varðandi þjónustu talmeinafræðinga til barna í leikskólanum.

Sveitarfélagið ber ábyrgð á að sinna talþjálfun barna samkvæmt þeim viðmiðum sem sett hafa verið um verkaskiptingu Sjúkratrygginga (SÍ) og sveitarfélaga. Viðmiðið er á þann veg að alvarlegri vandi á málþroska fellur undir SÍ meðan vægari vandi fellur undir sveitarfélög. Foreldrar bera ábyrgð á að sækja þjónustu til SÍ þó að Múlaþing hafi reynt og mun halda áfram að greiða götu þeirra barna með samningi við ákveðna talmeinafræðinga. Fjölskylduráð vonar að með núverandi fyrirkomulagi fái öll börn í Múlaþingi þá þjónustu talmeiningafræðinga sem þau þurfa.

Samþykkt samhljóða með handauppréttingu.

Fyrir liggur staðfesting á lokaúttekt Mennta- og barnamálaráðuneytis á ytra mati í Hádegishöfða, dagsett 2. apríl 2024.

Lagt fram til kynningar.

Fyrir liggur erindisbréf fyrir starfshóp sem meta á þá valkosti er koma til greina varðandi lausn á húsnæðisvanda leikskólans Bjarkatúns.

Í starfshópnum situr fyrir minnihlutann Jóhann Hjalti Þorsteinsson og fyrir meirihlutann Sigurður Gunnarsson. Fulltrúi úr heimastjórn Djúpavogs verður Ingi Ragnarsson, fulltrúi starfsfólks verður Hugrún Malmquist Jónsdóttir og fyrir hönd foreldra verður Helga Rún Guðjónsdóttir.
Starfshópurinn skal skila tillögum til fjölskylduráðs fyrir 31. ágúst 2024.

Samþykkt samhljóða með handauppréttingu.

Fyrir liggur erindi frá foreldraráði leikskólans Tjarnarskógar, dagsett 16. 4. 2024. Í erindinu er óskað eftir að fjölskylduráð endurskoði þá ákvörðun að bjóða ekki upp á veganfæði fyrir börn í Tjarnarskógi.

Ráðið telur ekki fært að svo stöddu að enduskoða ákvörðun um að bjóða upp á veganfæði fyrir börn í Tjarnarskógi. Ráðið vísar í bókun sína frá 9. 4. 2024 og jafnframt leggur það til að farið verði í heildræna stefnumótun vegna framboðs á sérfæði í mötuneytum skóla í Múlaþingi.

Samþykkt með þremur atkvæðum (SG)(ÁMS)(GLG). Einn á móti (GBH) og tveir sitja hjá (JHÞ)(BE).

Jóhann Hjalti Þorsteinsson lagði fram eftirfarandi bókun.
Ég get ekki tekið undir neitun við erindinu. Um leið og ég geri mér grein fyrir að aðstaða er ekki fyrir hendi í mötuneyti Egilsstaðaskóla til að sinna óskum foreldra um veganfæði vil ég ekki gefa foreldrunum þvert nei. Mér hugnast betur að prófað verði í eitt ár að verða við óskunum. Ég hvet til þess að málið verði kannað þannig að greint verði hvað þurfi að koma til svo hægt verði að verða við óskum foreldra. Ég mun því sitja hjá.

Fyrir liggja upplýsingar um rauntímamætingu á móti skráðum dvalartíma barna í leikskólum Múlaþings veturinn 2024.

Lagt fram til kynningar.

Fyrir liggja endurskoðaðar reglur leikskóla í Múlaþingi. Breytingarnar eru í samræmi við bókun fjölskylduráðs frá 7. 5. 2024 einnig er búið að aðskilja innritunarreglur frá reglum leikskóla.

Samþykkt samhljóða með handauppréttingu.

Fyrir liggja nýjar reglur um innritun barna í leikskóla Múlaþings. Reglurnar voru áður í reglum leikskóla í Múlaþingi en ákveðið var að hafa þessar tvær reglur aðskildar.

Samþykkt samhljóða með handauppréttingu.

Fyrir liggur tillaga að fundardagatali allra nefnda Múlaþings frá júní til desember 2024.

Fjölskylduráð leggur til að fundur sem á að vera 6. ágúst verði færður til 13. ágúst einnig leggur ráðið til að fundur skráður 26. ágúst verði 27. ágúst.

Samþykkt samhljóða með handauppréttingu.

Lagt fram til kynningar.