Umhverfis- og framkvæmdaráð Múlaþings

Fyrir umhverfis- og framkvæmdaráði liggja niðurstöður vegna útboðs á úrgangsþjónustu Múlaþings og Fljótsdalshrepps 2024-2028.
Verkefnastjóri umhverfismála sat fundinn undir þessum lið.

Eftirfarandi tillaga lögð fram:
Umhverfis- og framkvæmdaráð samþykkir, með fyrirvara um ákvörðun kærunefndar útboðsmála, að gengið verði til samninga við lægstbjóðanda gildra tilboða í samræmi við fyrirliggjandi niðurstöðu útboðs. Málinu vísað til sveitarstjórnar til staðfestingar.

Samþykkt samhljóða.

Tillaga um breytingu á Aðalskipulagi Fljótsdalshéraðs vegna frístundasvæðis við Eiða lauk þann 2. ágúst sl. og bárust athugasemdir sem taka þarf afstöðu til í samræmi við 1. mgr. 32. gr. skipulagslaga. Fyrir liggur minnisblað með drögum að umsögn um athugasemdirnar.
Jafnframt er lagt fram minnisblað frá málsaðila með frekari upplýsingum sem óskað var eftir á síðasta fundi ráðsins.
Skipulagsfulltrúi situr fundinn undir þessum lið.

Eftirfarandi tillaga lögð fram:
Ráðið fór yfir umsagnirnar og samþykkir að gerðar verði lagfæringar á skipulagstillögunni í samræmi við fyrirliggjandi minnisblað og henni vísað til sveitarstjórnar til staðfestingar.

Samþykkt með 4 atkvæðum, 3 voru á móti (ÁMS, ÁHB og ÞÓ).

Fulltrúar V og L-lista (ÁMS, ÁHB og ÞÓ) leggja fram eftirfarandi bókun:
Veigamiklar athugasemdir við skipulagstillöguna bárust m.a. frá Landi og Skógi, Umhverfisstofnun og Náttúrufræðistofnun. Fram kom skýr gagnrýni á umhverfisáhrif sem af framkvæmdinni mun hljótast, þar með talið rask á votlendi. Því samþykkjum við ekki skipulagstillöguna þó gerðar verði breytingar á henni í samræmi við meðfylgjandi minnisblað.

Auglýsingu deiliskipulags í landi Klaustursels á Jökuldal lauk þann 28. ágúst 2024 án athugasemda.

Eftirfarandi tillaga lögð fram:
Umhverfis- og framkvæmdaráð samþykkir fyrirliggjandi skipulagstillögu og vísar henni til staðfestingar hjá heimastjórn Fljótsdalshéraðs í samræmi við 41. gr. skipulagslaga nr. 123/2010.

Samþykkt samhljóða.

Fyrir liggur umsókn frá lóðarhafa Úraníu (L213204) á Borgarfirði, um stækkun á lóðinni vegna fyrirhugaðrar byggingar á um 40 fermetra gestahúsi.

Eftirfarandi tillaga lögð fram:
Umhverfis- og framkvæmdaráð vísar málinu til umsagnar hjá heimastjórn Borgarfjarðar áður en það verður tekið til frekari umfjöllunar hjá ráðinu.

Samþykkt samhljóða.

Framkvæmda- og umhverfismálastjóri fer yfir stöðu verkefnisins en í samræmi við bókun ráðsins á 121. fundi var henni falið að ræða nýja nálgun við aðra aðila samningsins; Minjavernd og Ríkissjóð.

Eftirfarandi tillaga lögð fram:
Umhverfis- og framkvæmdaráð leggur til við Byggðaráð að breyting verði gerð á verkefninu um Gamla ríkið á Seyðisfirði í samræmi við þær hugmyndir sem fengist hafa samþykktar hjá Minjavernd og Ríkissjóði.
Umhverfis- og framkvæmdaráð leggur til að húsið, í heild, verði auglýst til sölu til áhugasamara aðila um uppbyggingu þess innan núverandi lóðar. Með verkefninu mun fylgja það fjármagn sem fengist hefur frá ríkinu til endurbyggingar.

Samþykkt samhljóða.

Fyrir liggur minnisblað starfsmanna í tengslum við nýja brú yfir Lagarfljót.

Eftirfarandi tillaga lögð fram:
Umhverfis- og framkvæmdaráð samþykkir að fela framkvæmda- og umhverfismálastjóra að koma minnisblaðinu á framfæri við Vegagerðina.

Samþykkt samhljóða.