Umhverfis- og framkvæmdaráð Múlaþings

Fyrir umhverfis- og framkvæmdaráði liggja drög að endurskoðun á erindisbréfi fyrir byggingarnefndina.

Eftirfarandi tillaga lögð fram:
Umhverfis- og framkvæmdaráð samþykkir fyrirliggjandi drög að endurnýjuðu erindisbréfi nefndarinnar. Jafnframt samþykkir ráðið að skipa Svandísi Egilsdóttur sem fulltrúa V-lista í nefndinni í stað Andrésar Skúlasonar. Þá samþykkir ráðið að Karl Lauritzson skuli vera formaður nefndarinnar.

Samþykkt samhljóða með handauppréttingu.

Málið var áður á dagskrá á fundi umhverfis- og framkvæmdaráðs 20. janúar 2021. Fram hefur komið að kostnaðaráætlun vegna framkvæmdarinnar er verulega umfram það sem ætlað var til verksins.

Eftirfarandi tillaga lögð fram:
Ráðið felur yfirmanni eignasjóðs að vinna með fræðslustjóra, stjórnendum Seyðisfjarðarskóla og heimastjórn Seyðisfjarðar að því að leita leiða til úrbóta á húsakosti Seyðisfjarðarskóla til bráðabirgða, sem rúmist innan ramma fjárhagsáætlunar ársins 2021.

Samþykkt samhljóða með handauppréttingu.

Umhverfis- og framkvæmdamálastjóri og formaður gerðu grein fyrir fyrirhuguðum verkefnum við byggingu íbúðarhúsnæðis á Seyðisfirði, ásamt öðru sem skoðað hefur verið og tengist lóðamálum á Seyðisfirði. Fram kom að á Seyðisfirði sé nægt framboð byggingarlóða fyrir einbýlishús en skortur á lóðum fyrir par- og raðhús, sem nokkur ásókn er í að reisa. Í yfirferðinni kom einnig fram að verið sé að skoða lóðir við Hlíðarveg og Múlaveg auk lóðar við Túngötu og hugsanlegrar viðbótar við Garðarsveg og Leirubakka sem þá kosti sem fyrst væri hægt að nýta. Einnig að skoða deiliskipulag nýrrar íbúðabyggðar á núverandi fótboltavelli.

Málið er í vinnslu.

Formaður gerði grein fyrir vinnu við gerð á nýju sniðmáti fyrir lóðaleigusamninga sveitarfélagsins og gerð nýrrar samþykktar um úthlutun lóða í Múlaþingi. Stefnt er að því að drög að hvoru tveggja verði lögð fyrir næsta fund ráðsins.

Málið er í vinnslu.

Fyrir umhverfis- og framkvæmdaráði liggur að ræða hvort veita eigi afslætti af gatnagerðargjöldum á einstökum svæðum eða einstökum lóðum innan sveitarfélagsins. Samkvæmt nýrri samþykkt um gatnagerðargjöld í sveitarfélaginu er veittur almennur afsláttur af íbúðalóðum vegna mikillar jarðvegsdýptar, að hámarki 75%. Formaður kynnti tillögu að föstum afslætti af gatnagerðargjöldum árið 2021 á skilgreindum svæðum innan sveitarfélagsins. Einnig rætt um afslátt á einstökum byggingarlóðum.

Afgreiðslu frestað til næsta fundar.

Fyrir umhverfis- og framkvæmdaráði liggja tillögur í fjórum liðum er varða umferðaröryggismál á Seyðisfirði. Þær eru efnislega þessar:
1. Að Suðurgötu, frá Árstíg að Garðarsvegi, verði breytt í vistgötu.
2. Norðurgötu verði breytt í vistgötu.
3. Að hverfa frá fyrri ákvörðun bæjarstjórnar um biðskyldu á gatnamótum Botnahlíðar og Múlavegar.
4. Að setja upp umferðarspegil suðvestan við gatnamót Ránargötu og Fjarðargötu eða fjarlægja aspir sem eru á horninu við áhaldahúsið.

Eftirfarandi tillaga lögð fram:
Umhverfis- og framkvæmdaráð samþykkir tillögu 4 og felur umhverfis- og framkvæmdamálastjóra að láta framkvæma einhverja útfærslu hennar. Ráðið samþykkir einnig að fela umhverfis- og framkvæmdamálastjóra að láta afla frekari gagna varðandi tillögur 1-3 og leggja málið að því loknu á ný fyrir ráðið.

Samþykkt samhljóða með handauppréttingu.

Fyrir umhverfis- og framkvæmdaráði liggur umsókn um byggingarleyfi fyrir bílskúr, með aðkomu frá Bjarkarhlíð, og viðbyggingu við íbúðarhús sem hýsi móttöku fyrir dýraspítala sem áform eru um að verði í húsinu, með aðkomu frá Tjarnarási. Ekki er í gildi deiliskipulag af svæðinu.

Eftirfarandi tillaga lögð fram:
Umhverfis- og framkvæmdaráð leggst gegn þeim áformum sem fram koma í umsókninni, enda eru þau í ósamræmi við skilgreiningu svæðisins sem íbúðasvæðis í aðalskipulagi. Málinu er vísað til heimastjórnar Fljótsdalshéraðs til afgreiðslu.

Samþykkt samhljóða með handauppréttingu.

Fyrir umhverfis- og framkvæmdaráði liggur umsókn um lóðirnar Bjarkasel 10 og Bjarkasel 12 á Egilsstöðum. Umsækjandi óskar eftir breytingu á skipulagsskilmálum lóðarinnar til að byggja þar sex íbúða fjölbýlishús á tveimur hæðum.

Eftirfarandi tillaga lögð fram:
Umhverfis- og framkvæmdaráð samþykkir að láta fara fram grenndarkynningu til minniháttar breytingar á deiliskipulagi svæðisins, í samræmi við áform umsækjanda. Skipulagsfulltrúa er falið að kalla eftir gögnum frá umsækjanda til að framkvæma grenndarkynningu og leggja þau fyrir ráðið um leið og þau liggja fyrir.

Samþykkt samhljóða með handauppréttingu.

Fyrir umhverfis- og framkvæmdaráði liggur umsókn um lóðirnar Klettasel 1 og Klettasel 3 á Egilsstöðum til að reisa þar eitt parhús.

Málinu frestað til næsta fundar.

Fyrir umhverfis- og framkvæmdaráði liggur umsókn um lóðirnar Hamrar 11 og Hamrar 13 á Egilsstöðum. Umsækjandi óskar eftir breytingu á skipulagsskilmálum lóðanna til að byggja þar tvö parhús á einni hæð.

Eftirfarandi tillaga lögð fram:
Umhverfis- og framkvæmdaráð samþykkir að láta fara fram grenndarkynningu til minniháttar breytingar á deiliskipulagi svæðisins, í samræmi við áform umsækjanda. Skipulagsfulltrúa er falið að kalla eftir gögnum frá umsækjanda til að framkvæma grenndarkynningu og leggja þau fyrir ráðið um leið og þau liggja fyrir.

Samþykkt samhljóða með handauppréttingu.