Félagsmálanefnd

Drög að starfsáætlun félagsþjónustunnar fyrir árið 2015 lögð fram og samþykkt.

Drög að uppfærðum reglum Félagsþjónustu Fljótsdalshéraðs um fjárhagsaðstoð lagðar fram og samþykktar þó með breytingu er varðar 17. gr. reglnanna, þar sem fram kemur að undanþágur séu afgreiddar af félagsmálanefnd í stað verkefnastjóra félagsþjónustunnar.

Umræður um ferðaþjónustubíl Fljótsdalshéraðs. Viðgerðarkostnaður hefur farið vaxandi sl. tvö ár og er kostnaðurinn um ein milljón króna það sem af er þessu ár og fyrirsjáanlegar frekari viðgerðir. Bíllinn er bakhjóladrifin og erfiður í notkun yfir vetrartímann auk þess sem ekki er lyftubúnaður í bílnum og þurfa starfsmenn því að nota handafl til að koma hjólastólum inn og út úr bílnum. Félagsmálanefnd telur að endurnýjunar sé þörf á ferðaþjónustubíl sveitarfélagsins og felur félagsmálastjóra að kanna möguleika á endurnýjun ferðaþjónustubílsins.

Drög að breyttum reglum vegna ferðaþjónustu lagðar fram og samþykktar.

Drög að breyttri gjaldskrá um ferðaþjónustu lögð fram og samþykkt. Í ljósi þess að almenningssamgöngur verða gjaldfrjálsar á Fljótsdalshéraði frá 1. janúar 2015, verður ferðaþjónusta fyrir fatlað fólk í þéttbýli einnig gjaldfrjáls.

Drög að breyttum reglum og gjaldskrá fyrir Hlymsdali lögð fram. Erindinu er vísað til bæjarstjórnar með tillögu um að endurskoðun fari fram á gjaldskrám um útleigu á húsnæði sveitarfélagsins.