Áformað laxeldi í Seyðisfirði: Þörf sýnist á frekara hættumati vegna ofanflóða fyrir mannvirki í sjó.

Fulltúar V-lista (PH og ÞÓ) leggja fram eftirfarandi tillögu:
Í umsögn Veðurstofu Íslands 20.01. 2024 um tillögu MAST að rekstrarleyfi fyrir laxeldið í Seyðisfirði kemur skýrt fram það mat Veðurstofunnar að gera þurfi frekara hættumat. Það byggir á því að slíkt mat hefur ekki verið gert gagnvart þeim möguleika að ofanflóð falli og ógni laxeldismannvirkjum, beint eða óbeint vegna flóðbylgju, svo af hlytist umhverfisslys vegna risavaxinnar slysasleppingar, mengunar eða annarra ófyrirséðra afleiðinga. Með hliðsjón af þessu beinir umhverfis- og framkvæmdaráð því til sveitarstjórnar að taka undir mat Veðurstofu Íslands og hvetja til frekara hættumats, áður en tekin verður afstaða til leyfisveitingar.

Tillagan var felld með 4 atkvæðum (JB, ÞB, EGG, BSP), 2 voru samþykkir (PH, ÞÓ) og 1 sat hjá (ÁHB).

Fulltúar V-lista (PH og ÞÓ) leggja fram eftirfarandi bókun:
Með því að meirihluti Umhverfis- og framkvæmdaráðs felldi ofangreinda tillögu, þá teljum við að horft sé fram hjá þeim möguleika að orðið geti ofanflóð sem ógni laxeldismannvirkjum með alvarlegum afleiðingum, ekki síst fyrir náttúru og lífríki. Slíkt samræmist að okkar mati ekki skyldum og góðum starfsháttum fagráðs sem hefur beina aðkomu að skipulagi landmegin við netalögn, þ.e. innan 115 m frá stórstraumsfjöru.

Lagt fram til kynningar.

Fyrir liggur tölvupóstur frá Jóni Halldóri Guðmundssyni dags. 23.janúar sl. þar sem hann óskar eftir að tekin verði til umfjöllunar umsögn Veðurstofunnar um tillögur MAST að rekstrarleyfi Kaldvíkur á starfsvæði fyrirhugaðs laxeldis í Seyðisfirði.

Fulltrúi heimastjórnar Jón Halldór Guðmundsson leggur fram eftirfarandi tillögu:
Í umsögn Veðurstofu Íslands 20.01. 2024 um tillögu MAST að rekstrarleyfi fyrir laxeldið í Seyðisfirði kemur fram það mat Veðurstofunnar, að laxeldiskvíar í Seyðisfirði séu á ofanflóðahættusvæði og að gera þurfi frekara hættumat. Það byggir á því að slíkt mat hefur ekki verið gert gagnvart þeim möguleika að ofanflóð falli og ógni laxeldismannvirkjum, beint eða óbeint vegna flóðbylgju, svo af hlytist umhverfisslys vegna risavaxinnar slysasleppingar, mengunar, hættu fyrir starfsmenn eða annarra ófyrirséðra afleiðinga. Með hliðsjón af þessu beinir Heimastjórn Seyðisfjarðar því til sveitarstjórnar að vekja athygli leyfisveitenda á þessu mati Veðurstofu Íslands og óska eftir frekara hættumati, áður en tekin verður afstaða til leyfisveitingar.

Tillagan felld með tveimur atkvæðum (JB,MG), einn með (JHG)

Jón Halldór leggur fram eftirfarandi bókun:
Undanfarin ár hefur hefur náttúruvá haft mikil áhrif á athafnalíf og mannlíf á Seyðisfirði. Grundvöllur undir atvinnulíf á stóru svæði í bænum hefur brostið. Einnig hefur mat á ofanflóðahættu takmarkað svigrúm til íbúðabyggðar.
Sveitarstjórn og opinberir aðilar eru að vinna að ofanflóðavörnum beggja megin fjarðar til að verja byggðina.
Nú blasa við ný atvinnutækifæri á Seyðisfirði sem margir binda vonir sínar við, í formi laxeldis í sjó í Seyðisfirði.
Mikilvægt er að faglega sé staðið að þessari uppbyggingu og í dag væri aldrei hægt að fá leyfi fyrir nýrri atvinnustarfsemi á landi með 6-10 nýjum störfum á skilgreindu ofanflóðahættusvæði.
Ég skora því á sveitarstjórn að kanna ítarlega hvort ástæða sé til að staldra við.
Nýlega hafa verið umræður um ábyrgð sveitarstjórnar annarsstaðar á Íslandi, sem brást ekki við upplýsingum um ofanflóðahættu fyrir allmörgum árum. Við viljum ekki taka slíka umræðu, þegar það er of seint.

Lagt fram til kynningar.