Byggðaráð Múlaþings

Fjármálastjóri og sveitarstjóri fóru yfir og kynntu mál er varða fjármál og rekstur sveitarfélagsins.

Fyrir lá listi yfir störf hjá Múlaþingi sem undanskilin eru verkfallsheimild árið 2022, komi til verkfalla, sbr. 19. gr. laga nr. 94/1986 um kjarasamninga opinberra starfsmanna.

Eftirfarandi tillaga lögð fram:
Að lokinni yfirferð yfir fyrirliggjandi drög samþykkir byggðaráð listann og felur skrifstofustjóra að sjá til þess að listinn verði birtur í B-deild Stjórnartíðinda innan tilskilins frests.

Samþykkt samhljóða án atkvæðageiðslu.

Fyrir lá fyrirspurn frá fundi umhverfis- og framkvæmdaráðs, dags. 19.01.2022, til byggðaráðs varðandi það hvort byggðaráð geri athugasemdir við að umsækjandi fái lóðunum Lónsleiru 11 og Lónsleiru 13 úthlutað.

Eftirfarandi tillaga lögð fram:
Svo fremi sem fyrirliggjandi umsóknir um umræddar lóðir standast þær körfur er gerðar eru samkvæmt gildandi skipulagi viðkomandi svæðis gerir byggðaráð Múlaþings ekki athugasemdir við að þeim verði úthlutað til umsækjanda.

Samþykkt samhljóða án atkvæðagreiðslu.

Fyrir liggur fundargerð stjórnar Sambands íslenskra sveitarfélaga, dags. 19.01.2022.

Lagt fram til kynningar.

Fyrir liggur fundargerð stjórnar HEF veitna, dags. 22.12.2021. Vakin er sérstök athygli á dagskrárliðum nr. 7 (Hreinsistöð á Melshorni), 9a (Skipulag á Djúpavogi) og 9b (Greiningarvinna hitunarvalkosta á Seyðisfirði).

Lagt fram til kynningar.

Fyrir lágu drög að úthlutun menningarstyrkja Múlaþings (fyrri úthlutun). Fram kemur að það bárust 29 umsóknir frá 25 aðilum samtals að fjárhæð kr. 18.011.112,- og að heildarkostnaður verkefna nemur kr. 58.158.346,-. Inn á fundinn tengdust Heiðdís Hólm Guðmundsdóttir og Jónína Brá Árnadóttir, verkefnastjórar menningarmála Múlaþings, og gerðu frekari grein fyrir málinu.

Eftirfarandi tillaga lögð fram:
Byggðaráð Múlaþings samþykkir, að tillögu verkefnastjóra menningarmála, að fyrri úthlutun menningarstyrkja Múlaþings nemi kr. 8.270.000,-. Verkefnastjóra menningarmála falið að koma úthlutun í framkvæmd í samræmi við fyrirliggjandi tillögur.

Samþykkt samhljóða án atkvæðagreiðslu.

Fyrir lá bókun frá fundi fjölskylduráðs Múlaþings, þar sem til umræðu var innheimta leikskólagjalda á farsóttartímum.

Eftirfarandi tillaga lögð fram:
Byggðaráð Múlaþings staðfestir samþykkt fjölskylduráðs um að þegar börn eru í sóttkví eða einangrun verði farið með það eins og um veikindi sé að ræða, en ef leikskóladeild eða heilum leikskólum er lokað séu leikskólagjöld felld niður þann tíma sem lokað er.

Samþykkt samhljóða án atkvæðageiðslu.

Undir þessum lið tengdust inn á fundinn lögreglustjóri Austurlands og yfirlögregluþjónn embættisins. Farið var m.a. yfir starfsemi embættisins á árinu 2021 með samanburði við fyrri ár. Stefnt er að því að aðilar komi saman á sambærilegum fundi á komandi hausti.