Íbúum Borgarfjarðar, Djúpavogs og Seyðisfjarðar gefst nú tækifæri til þess að koma beint að mótun stefnu um þjónustustig í byggðum sveitarfélagsins.
Samkvæmt sveitarstjórnarlögum ber sveitarfélögum skylda til þess að móta stefnu um það hvaða þjónustustigi skuli haldið upp í byggðum og byggðarlögum fjarri stærstu byggðarkjörnum og skal sú stefnumótun unnin í samráði við íbúa sveitarfélagsins.
Því hefur sveitarstjórn Múlaþings ákveðið að bjóða til íbúafunda á Borgarfirði eystra, Djúpavogi og Seyðisfirði. Á fundunum mun þátttakendum vera skipt í vinnuhópa þar sem þjónusta sveitarfélagsins verður rædd, sem og með hvaða hætti hún er veitt.
Á fundi sínum í nóvember er gert ráð fyrir að sveitarstjórn afgreiði stefnu sína samhliða fjárhagsáætlun til næstu fjögurra ára.
Fundirnir verða haldnir sem hér segir:
- Borgarfirði eystra - Álfakaffi 28. ágúst 2024, klukkan 17.00
- Djúpavogi - Hótel Framtíð 29. ágúst 2024, klukkan 17.00
- Seyðisfirði - Herðubreið 2. september 2024, klukkan 17.00
Fyrir áhugasama er hægt að kynna sér samantekt um fyrirkomulag þjónustu Múlaþings á heimasíðu sveitarfélagsins.
Þjónusta sveitarfélagsins er eitthvað sem snertir alla íbúa og því eru öll hvött til að grípa þetta frábæra tækifæri til þess að taka þátt í að móta það samfélag sem þau búa í og hafa áhrif á þá þjónustu sem sveitarfélagið veitir.
