Styrkleikarnir eru nýir leikar á vegum krabbameinsfélagsins en þeir voru haldnir í fyrsta sinn árið 2022 á Selfossi. Nú á að bæta í og halda leikana líka á Egilsstöðum þar sem Krabbameinsfélag Austurlands stendur fyrir viðburðinum.
Leikarnir felast í því að einstaklingar, fyrirtæki, stofnanir, fjölskyldur og/eða aðstandendur skrá sig í lið. Liðið fær afhent kefli sem halda þarf á hreyfingu í sólarhring, hvort sem það er með göngu, skokki, hjóli eða jafnvel að sitja í kerru. Boðskapurinn er að engin hvíld fæst frá krabbameini, ekki heldur á nóttunni.
Leikarnir verða haldnir 26. - 27. ágúst og verður fjölbreytt og falleg dagskrá auglýst síðar en hægt er að skoða þennan magnaða viðburð hér á heimasíðu krabbameinsfélagsins.
Múlaþing hvetur öll til að skrá sig.
