Nú er sjötta vika ársins 2023 hafin en hún hefur fest sig í sessi sem árleg vika kynheilbrigðis í skólum og félagsmiðstöðvum víða um land. Allar félagsmiðstöðvar Múlaþings helga dagskrá sína kynfræðslu og kynheilbrigðistengdum málefnum í viku 6 auk þess sem bókasöfnin á Egilsstöðum og Seyðisfirði hafa sett upp útstillingar með bókum tengdum vikunni.
Á hverju ári er unnið með mismunandi þemu en í ár er áherslan lögð á ,,Kynlíf og kynferðisleg hegðun". Ýmislegt er á döfinni í félagsmiðstöðvunum og verður meðal annars kynfærabakstur, kvikmyndakvöld, leikir, spurningakeppnir, trúnó og fleira.
Hluti af markmiðum þess að bjóða upp á þemaviku um kynheilbrigði í félagsmiðstöðvunum er meðal annars:
- Að þjálfa börn og unglinga í að koma auga á og virða sín eigin mörk og mörk annarra. Að þau átti sig á að hver einstaklingur er einstakur og mörk fólks geta verið misjöfn.
- Að auka þekkingu barna og unglinga varðandi kyn, kynvitund og kynhneigð, líkama, tilfinningar, réttindi, samskipti og kynheilbrigði.
- Að efla sjálfsmynd barna og unglinga og þjálfa þau í gagnrýnni hugsun. Að efla þau í að taka ákvarðanir sem valda þeim og öðrum vellíðan en ekki skaða.
- Að gera börn og unglinga meðvituð um kynheilsu sína og hvetja þau til að velja og hafna út frá sínum eigin forsendum en með virðingu fyrir öllum hlutaðeigandi að leiðarljósi.
